17 Ажьырныҳәа 2022

АЖӘАБЖЬҚӘА

Аԥсны Аҳәынҭқарра Ашәахтәқәеи аизгақәеи рминистрреи, Аҟәа ақалақьи егьырҭ аинспекциақәеи иаҳхысыз ашықәс 12 мзы ирылагӡаны инанагӡаз аусура алҵшәақәа реихшьаала инақәыршәаны, Аԥсны абиуџьет иалагалоуп 3 394,5 млн. мааҭ ашәахтәқәа, уи аан аплан ишьақәнаргылон 2 958,8 млн. мааҭ. Аплан нагӡоуп 115% рыла. Аԥаратә рбагақәа рыла аплан иарбаз аасҭа 435,7 млн. мааҭ рыла еиҳаны иалагалан. 2020-тәи ашықәс ԥхынҷкәынмзазы иалагалаз ашәахтәқәа ирҿырԥшны, алагалара адинамика 136% инаӡоит, ԥаратә рбагала уи ишьақәнаргылоит 890,4 млн. мааҭ.

Аҟәа. Ԥхынҷкәынмза 21, 2021 шықәса. Аҧсныпресс.  Аҧсны ажурналистцәа Реидгыла Аҧсуа телехәаҧшра аҭыхратә гәыҧ ирыдҳәаланы иҟалаз аинцидент инамаданы апротесттә акциа аиҿкааҩцәа рахь апротесстә ааҧхьара ҟанаҵоит. Аҧсны аҳәынҭқарратә Телерадиоеилахәыра аинформациатә маҵзура иҟанаҵаз адыррақәа рыла, ҧхынҷкәынмза 21, 2021 шықәса рзы Аҧсуа драматә театр аҿаҧхьа имҩаҧысуаз амитинг аҟны аҭыхрақәа рымҩаҧгараан Аҧсуа Телехәаҧшра аҭыхратә гәыҧ ааха аиуит. Амашьына арныҟәцаҩи аоператори ихәахәа-жьахәеит. Аоператор ивидеокамера имыржәеит, анаҩс иарбоу атехника ҧхасҭартәит. Аҧсны Аҳәынҭқарра ажурналистцәа Реидгылара ажурналистцәа закәанла рзанааҭтә усура анагӡара мчымхарала аҧырхагахара, атехника аҧҽра, уҳәа  ирыдҳәалоу афакт ишахәҭоу ала еилырганы, иарбоу аинцидент зыхҟьаз хымҧада ахьырхәра ишақәыршәахо азы агәыӷра аанарҧшуеит.

Аҟәа. Ԥхынҷкәынмза 21, 2021 шықәса. Аҧсныпресс.  Аҧсны Аҳәынҭқарра Ахада Аслан Бжьаниеи  аоппозициа ахаҭарнакцәеи реиҿцәажәара мҩаҧысуеит. Аҳәынҭқарра Ахада идикылеит «Аҧсны Жәлар Реиҿкаара» ахантәаҩы Адгәыр Арӡынбеи  Ауаажәларратә Еиҿкаара «Аруаа» ахантәаҩы Ҭемыр Гәлиеи, Аҧсны Жәлар Реизара-Апарламент Аиҳабы ихаҭыҧуаҩ Михаил Сангәлиеи. Аиҧылара рхы аладырхәит иара убас атәыла аҧыза-министр Алеқсандр Анқәаб, Аҳәынҭқарра Ахада  Иусбарҭа  анапхгаҩы  Алхас Кәыҵниа.

Аҟәа. Ԥхынҷкәынмза 21, 2021 шықәса. Аҧсныпресс. Аопозициа ахаҭарнакцәеи Аҳәынҭқарра Ахадеи реиҧылара ашьҭахь, Аҳәынҭқарра Ахада Иусбарҭа ахыбра аҿаҧхьа игылаз ауаа рахь ддәылҵит анаукеи акультуреи рызҵаарақәа рзы Аҳәынҭқарра Ахада иабжьгаҩ Нугзар Логәуа. Уи аиҿцәхажәарақәа шымҩаҧысыз атәы еиҭеиҳәеит. «Амитинг ахь иааз рхаҭарнакцәа еизаз ауаа рахь дцәырҵны дрыҿцәажәарц рҭахын. Аҳәынҭқарра Ахада акоронавирустә  ҿкы чымазара алаҵәара ашәарҭара ду аныҟоу аамҭазы иалагалоу аҧкратә уснагӡатәқәа инарымаданы  еиуеиҧшым асанкциа змам аусмҩаҧгатәқәа рымҩаҧгара алмыршара азы ихаҭа идикылаз Ақәҵара изеилагом ҳәа аҭак ҟаиҵеит. Убри аан уи мышқәак рышьҭахь, аҭагылазаашьа анҭышәынтәалахалак ашьҭахь, аоппозициа агәҭынчымра рызцәырызго азҵаарақәа зегьы рыла рыҿцәажәара дазхиоуп ҳәа иазгәеиҭеит», - ҳәа иҳәеит Нугзар Логәуа.

Аҟәа. Ԥхынҷкәынмза 21, 2021 шықәса. Аҧсныпресс.  Иахьа, 00:00 сааҭ инаркны 2021-2022 шш. аӡынтәи аамҭахәҭа азы ишьақәгылаз афымцалашаратә дефицит ахарҭәаара азы Урыстәылантәи Афедерациа аҟынтәи афымцалашара аиагара аҩбатәи аетап амҩаҧгара иалагеит, ҳәа адырра ҟанаҵоит Ареспубликатә Унитартә Наплакы «Амшынеиқәафымцамч» апресс-маҵзура. Уажәтәи аамҭазы, зфымцаеиқәыршәара Егрытәи Аӡфымцатә Станциеи Аӡфымцастанциа-1 аӡхыҽҽи рыла имҩаҧысуа Звольҳараку Афымцацәаҳәа «Шешелети-1», Звольҳараку Афымцацәаҳәа «Шешелети-2» уахь иналамҵакәа,  Ареспублика зегьы фымцалашарала аиқәыршәара мҩаҧысуеит Урыстәылатәи Афедерациа аҟынтәи иаауа афымцамч ала.

Аҟәа. Ԥхынҷкәынмза 21, 2021 шықәса. Аҧсныпресс.  Аоппозициатә мчрақәа амитинг анымҩаҧыргоз аамҭазы Аҳәынҭқарра Ахада Иусбарҭа Ахыбра аҿаҧхьа еизеит иҟоу амчра иадгыло ауаа. Еизаз рҿаҧхьа дықәгылауа анаукеи акультуреи рзы Аҳәынҭқарра Ахада иабжьгаҩ Нугзар Логәуа ареспублика аҿы апроблемақәа ыҟоуп, аха аҳәынҭқарра Анапхгара акоронавирустә ҿкы чымазара апандемиа инамаданы ауадаҩрақәа шырацәоугьы ауааҧсыра рыҧсҭазаара аиӷьтәреи иқәгылоу азҵаарақәа жәпакы рыӡбара алыршареи рзы иалшо зегьы ҟанаҵоит ҳәа инаҵшьны иазгәеиҭеит. «Ҳаҭашәымҵан аполитикатә ҭагылазаашьа аибарххара инамаданы  ҩаҧхьа шәахьҳашаргәамҵуа. Иаабоит аҭагылазаашьа еиҳа-еиҳа аҽеибарххара ишаҿу. Аҧсны Анапхгареи аоппозициатә мчрақәеи рыбжьара аконструктивтә диалог ашьақәыргылара  залымшахеит. Апарламентгьы ҩбаны аҽеихшара агәҭынчымра   ҳазцәырнамгар залшом. Сара сгәаанагарала, аиҿагылара аанымгылар ҳҳәынҭқарра даара ашәарҭара иҭагылар алшоит», - ҳәа инаҵшьны иазгәеиҭеит Нугзар Логәуа. Аҳәынҭқарра Ахада иабжьгаҩ ишазгәеиҭаз ала аӡәи-аӡәи ахара рыдҵара ҳааҟәыҵны аҧсуаа ираҭәам аҟазшьақәа мап рыцәкны, аҧсуа  ишихәҭоу ала ахымҩаҧгашьа алаҳхыр еиҳа еиӷьуп. «Аҧсны зегьы реиҳа акзаареи аилибакаареи анаҭаху аамҭазы ҳара зегьы – еиуеиҧшым апартиақәеи аиҿкаарақәеи ауаажәларра ахаҭарнакцәеи иаҳзеиҧшу уалҧшьаны иҟоуп – зегьы ҳааизхәыцны ишьақәгылаз аҭагылазаашьа лыҧхала  алҵра азы амҩа аҧшаара», - ҳәа иҳәеит иара.

Аҟәа. Ԥхынҷкәынмза 21, 2021 шықәса. Аҧсныпресс.  Аҟәа ақалақь, Амҳаџьыраа Рыҧшаҳәа аҿы, Аҧснытәи адраматә театр аҿаҧхьа иалагеит аопозициатә политикатә мчрақәа еиҿыркааз, аха атәыла анапхгара аганахьала асанкциа змам амитинг. Аҧсуа драматә театр ахаҿратә ган иадыкнаҳалоуп «Ажәлар угәра ргаӡом!», «Ажәлар умцҳәара иарааҧсеит!», «Аӡи алашареи ҳашәҭ!», «Аҧсны аҭира ҳаәагылоит!»»Иҟауҵеи уара уҧсадгьыл азы!?», «Аминауаҭра шьҭаҵаны уқәҵ!», Знык  ачарҳәара зуз, уи даҽазныкгьы иҟаиҵоит!», уҳәа  изну еиуеиҧшым алозунгқәа. Амитинг аартуа ауаажәларратә усзуҩ Ахра Бжьаниа аоппозициа атәыла анапхгарахь иамоу азҵаарақәа дырзааҭгылеит. Уи апандемиа, асоциал зҵаарақәа, аенергетика, уҳәа ирызкын. «Апандемиа иадҳәалоу аҭагылазаашьа аагозар. Атәыла анапхгара ааҭакҧхықәрадара иахҟьаны шәҩыла ҳтәылауаа рыҧсҭазаара иалҵит.  Аенергетика акәзар, уи амаининг алегализациа ала зынӡа излаҟаз ала еицәартәит, Урыстәылантәи Аҧсныҟа афымцамч аиагара азы ҳара зегьы уалны иҳадхало аҧаратә шәагаақәа шаҟа ыҟоу еилкаамкәа иаанхоит.Ауаажәларра аума, аоппозициа аума, иара апрессагыь аума изеиҧшразаалак адиалог рыбжьаҵаӡам.  Азакәан иҟоу анапхгара иадымгыло рганахзьала ауп аус ахьауа. Даара агәҭынчымра узцәырнамгар залшом асуверенитет азҵаарагьы. Изакәытә дәныҟаекономикатә аҧшьгарақәеи иҳадыргало иахьа, иарбан  аҩаӡарарацәатәи Қырҭтәыла аиҿцәажәаақәа зыӡбахә рымоу!? Ҳсуверенитет иарбан шароу излацәажәо!?.  Уи азы иҳадыргало арбан!? Иара азҵаарагьы зынӡа ацәырҵра шҧалыршахеи!?  Азҵаарақәа акыр ирацәаны еизеит, урҭ иахьа ҳрылацәажәараны ҳаҟоуп», - ҳәа иҳәеит Ахра Бжьаниа.  Ахра Бжьаниа иара убас еизаз иргәалаиршәеит мызки бжаки раҧхьа араҟа имҩаҧгаз амитинг атәы. Уи иажәақәа рыла уи апроблемагьы иахьа араҟа иалацәажәараны иҟоуп.

Ауаажәларратә еиҿкаара «Аруаа» ахантәаҩы Ҭемыр Гәлиа иқәгылараҿы  иазгәеиҭеит Аслан Бжьаниа атәыла анапхгара данахагыла  инаркны цқьа изызхәыцым адәныҟатәи аполитика, аекономикатә ҭагылазаашьа аицәахара, ауаажәлар рсоциалтә ҭагылазаашьа ауадаҩхара иадҳәаланы атәыла лассы-лассы иархыџхыџуа ишалагаз аиҿагыларақәа, аҭыӡшәақәа, ауаҟьан-чаҟьанқәа… «56% абыжьқәа рыла Аҳәынҭқарра Ахадас иалхыз Аслан Бжьаниа икомандеи иареи ажәлар реизҳазыӷьареи аҳәынҭқарратә шьақәгылара арӷәӷәареи утәы-стәы ҳәа реихшара мап ацәкны ажәлар реидкылареи рзы аус рулоит ҳәа агәыӷра ҳамамзи, аха аус аҿы ҩы-шықәса ҵырц акгьы агым, арахь алхрақәа раан ажәлар зықәдыргәыӷыз азҵаарақәа рҟынтәи акызаҵәык анагӡара залмыршахеит.   Убри аҟнытә иҟоу азы аҭакҧхықәра ахахьы агара азы аамҭа ааит ҳәа иҳаҧхьаӡоит», -ҳәа иҳәеит Ҭемыр Гәлиа.

Аҟәа. Ԥхынҷкәынмза 20, 2021 шықәса. Аҧсныпресс.  Ԥхынҷкәынмза 20, 2021 шықәса  рзы  Шәача  ақалақь аҿы имҩаҧысит Аҧсны Аҳәынҭқарреи Урыстәылатәи Афедерациеи рыдәныҟаекономикатә Хылаҧшырҭақәа рнапхгаҩцәа Инал Арӡынбеи Сергеи Лаврови реиҧылара. Аганқәа Аҧсни Урыстәылеи ирыбжьоу аизыҟазаашьақәа ирыдҳәалоу хадара злоу азҵаарақәа жәпакы ирылацәажәеит, аҩганктәи амшхәаҧштә азы агәаанагарақәа реибыҳәара мҩаҧысит. Урыстәылатәи аган аҟынтәи Аҧсны ашәарҭадара арӷәӷәареи асоциал-економикатәи агуманитар-культуратә усхкқәа рыҿиареи рганахьала адгылара ишазхиоу азы аҳәамҭа ҟаҵахеит.

Аҟәа. Ԥхынҷкәынмза  20, 2021 шықәса. Аҧсныпресс. Аҧсны аҧыза-министри аҳәынҭқарратә шәарҭадара Амаҵзура ахантәаҩи реиҧылара аҿы  Алеқсандр Анқәаб Роберт Киути аҳәынҭқарратә шәарҭадара Амаҵзура аколлективи рзанааҭтә ныҳәа рыдиныҳәалеит. 

Аҟәа. Ԥхынҷкәынмза 20, 2021 шықәса. Аҧсныпресс.  Аҧсны аҩныҵҟатәи аусқәа рминистр Вальтер Быҭәба ареспублика ауааҧсыра рахь азакәантә шьаҭа змам амитингқәа рылахәхара  мап ацәыркырц азы ааҧхьара ҟаиҵеит.

*** «Ҳаҭыр зқәу Аҧсны Аҳәынҭқарра атәылауаа! Азакәанреи азиеиҿкаареи  атәылауаа зегьы ршәарҭадареи ринтерессқәеи иара рыҧсҭазаареи рыхьчара алзыршоазинтә ҳәынҭқарра апринцип хадақәа иреиуоуп. Арҭ афункциақәа зегьы реиҳарак амилициа иадҵоуп. Иахьа Аҧсны Аҳәынҭқарра аҩныҵҟатәи аусқәа Рминистрра Азакәани Аконституциатә шьақәгылашьеи ииашамкәа азныҟәареи ирызны аусура мҩаҧнагоит.

ПАРЛАМЕНТ-НАРОДНОЕ СОБРАНИЕ РА<br>Официальный сайт
АГЕНТСТВО ПРАВИТЕЛЬСТВЕННОЙ СВЯЗИ РА<br>Официальный сайт
АДМИНИСТРАЦИЯ ПРЕЗИДЕНТА РЕСПУБЛИКИ АБХАЗИЯ<br>Официальный сайт
МЧС РЕСПУБЛИКИ АБХАЗИЯ<br>Официальный сайт
КАБИНЕТ МИНИСТРОВ РЕСПУБЛИКИ АБХАЗИЯ<br>Официальный сайт
МИНЗДРАВ РЕСПУБЛИКИ АБХАЗИЯ<br>Официальный сайт
МИНИСТЕРСТВО ИНОСТРАННЫХ ДЕЛ РЕСПУБЛИКИ АБХАЗИЯ<br>Официальный сайт
ГЕНЕРАЛЬНАЯ ПРОКУРАТУРА РЕСПУБЛИКИ АБХАЗИЯ<br>Официальный сайт
АКАДЕМИЯ НАУК АБХАЗИИ ГОСУДАРСТВЕННОЕ НАУЧНОЕ УЧРЕЖДЕНИЕ «СУХУМСКИЙ ФИЗИКО – ТЕХНИЧЕСКИЙ ИНСТИТУТ»
СУХУМ<br>Официальный сайт
МВД РЕСПУБЛИКИ АБХАЗИЯ<br>Официальный сайт
AUSURA.SU<br>Биржа труда
Яндекс.Метрика

Login to your account

Username *
Password *
Remember Me