21 Лаҵара 2022

Актуальное

АҾЦӘАЖӘАРА

АГӘААНАГАРАҚӘА

Амедиа

« Лаҵара 2022 »
Mon Tue Wed Thu Fri Sat Sun
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          

АЖӘАБЖЬҚӘА

Аҟәа. Хәажәкырамза 12, 2022 шықәса. Аԥсныпресс.  Асааҭ 20:00 рзы ихыркәшахеит Аԥсны Жәлар Реизара-Апарламент ахь алхрақәа.  35 алхратә округқәа рҿы (152 алхратә ҭыԥқәа) зыбжьы азҭаз алхыҩцәа рыбжьқәа рыԥхьаӡара иалагахьеит.

Алхрақәа мҩаԥысит ҳәа иԥхьаӡоуп асиа хада иану алхыҩцәа рзеиԥш хыԥхьаӡара аҟынтәи  25% еиҵамкәа  рхы аладырхәызар.

Иалхуп ҳәа иԥхьаӡахоит алхрақәа рҿы зхы алазырхәыз ауаа реиҳараҩык рыбжьқәа зауз  адепутатрахь акандидатцәа.

Аҟәа. Хәажәкырамза 12, 2022 шықәса. Аԥсныпресс. Аԥсны Алхратә Комиссиа Хада адыррақәа рыла, асааҭ 18:00 рзы алхрақәа зхы алазырхәыз алхыҩцәа рхыԥхьаӡара 40,2 % аҟынӡа инаӡеит.

Алхрақәа мҩаԥысит ҳәа иԥхьаӡоуп 33 округ рҿы.

Алхратә округақәа ҩба рҿы  -   Аҟәатәи алхратә округ №2 (Аҳабла Ҿыц), иара убас   алхратә  округ №10 (Пицундатәи) рҿы макьаназы 25-проценттәи аҩаӡара иахымсӡацт. Алхратә округ №2 аҿы иааз алхыҩцәа рхыԥхьаӡара 21,9%, алхратә округ №10 - 23,6%.

Аҟәа. Хәажәкырамза 12, 2022 шықәса. Аԥсныпресс. Иахьа Аԥсны Аҳәынҭқарраҿы имҩаԥысуеит Жәлар Реизара-Апарламент ахь алхрақәа. Жәларбжьаратәи анаԥшыҩцәа раҳасабала ҳтәыла иаҭааит Урыстәылеи Белоруссиеи Реидгыла Апарламенттә Еизара ахаҭарнакцәа.

Аԥсны Алхратә Комиссиа Хада аҿы имҩаԥысыз апресс-конференциа аҿы иқәгылеит Апарламенттә Еизара  аҭакзыԥхықә маӡаныҟәгаҩ Сергеи Стрельченкои атәылахьчара азы Урыстәылатәи Афедерациа Аҳәынҭқарратә Дума Акомитет ахантәаҩы актәи ихаҭыԥуаҩ, ашәарҭадареи атәылахьчареи ацәгьоура аҿагылареи рзы Апарламенттә Еизара Акомиссиа ахантәаҩы ихаҭыԥуаҩ,   аделегациа акоординатор  Андреи Красови.  

«Ҳара Аҟәа ақалақь аҿы алхратә ҭыԥқәа хәба ҳарҭааит, уаҟа иҟоу аҭагылазаашьа гәаҳҭеит, урҭ зегьы ианаамҭаз иаатит, аусура ҭышәынтәаланы имҩаԥысуеит. Асааҭ  12 аламҭалазы алхыҩцәа раара 10 - 15 процент инарзынаԥшуан. Ҳара арҭ арбагақәа ԥыхьа Апарламент ахь имҩаԥысуаз алхрақәа ирҿырԥшны ҳахәаԥшит, усҟан алхыҩцәа раара акыр еиҳан, аха уи амшцәгьа иадҳәалазар алшоит. Ауаа активла рыбжьқәа арҭоит, анаԥшыҩцәа ыҟоуп, изеиԥшразаалак аилагарақәа аарԥшӡам, сара сгәаанагарала ус иҟазаауеит алхрақәа рхыркәшараанӡа», - ҳәа иҳәеит  Андреи Красов.

Аҟәа. Хәажәкырамза 12, 2022 шықәса. Аԥсныпресс. 35 округ рҟынтәи 27 округ рҿы алхрақәа рымҩаԥысра шьақәгылеит ҳәа иԥхьаӡоуп. Араҟа алхыҩцәа раара  аҩаӡара 25% иахысит.

Иааизакны ареспублика иахьаҵанакуа алхыҩцәа раара 28,6% аҟынӡа инаӡеит.

Аҟәа. Хәажәкырамза 12, 2022 шықәса. Аԥсныпресс. Аԥсны Иҷыдоу аҭагылазаашьақәа рзы Аминистрра агуманитартә еидара зқәу амашьынақәа рколонна Донбас аҟынӡа инаӡеит. Аԥснытәи аиқәырхаҩцәа хәажәкырамза 12 рзы ЛЖәР ауааԥсыра рзы афатә аалыҵқәа, апаҭлыкақәа  ирҭоу аӡрыжәтә,  амаҭәа ԥхақәа, ахәыҷқәа рзы ахәамаргақәа, уҳәа ааргеит, ҳәа адырра ҟанаҵоит Аԥсны Иҷыдоу аҭагылазаашьақәа рзы Аминистрра аофициалтә саит.

Аҟәа. Хәажәкырамза 12, 2022 шықәса. Аԥсныпресс. Аԥсны имҩаԥысуа апарламенттә алхрақәа рымҩаԥысшьа агәаҭаразы арахь иааны иҟоуп Урыстәыла, ЛЖәР, ДЖәР, Аахыҵ Уаԥстәыла, Приднетровие, уҳәа рҟынтәи анаԥшыҩцәа.

«Сара уажәаԥхьагьы Аԥсныҟа саахьан. Ари уажәы хынтәуп жәларбжьаратәи анаԥшҩы иаҳасабала алхрақәа схы аласырхәуеижьҭеи. Усҟан еиԥш уажәгьы иазгәсҭарц сҭахуп ареспублика аҿы имҩаԥысуа алхрақәа иҭышәынтәаланы, адемократиатә ҟазшьа рыманы ишымҩаԥысуа атәы», - ҳәа иҳәеит ЛЖәР Алхратә Комиссиа Хада ахантәаҩы Елена Кравченко. «Ҳара Урыстәылатәи Афедерациа Алхратә Комиссиа Хада аҟынтәи анаԥшыҩцәа ҳрыцны еиуеиԥшым аокругқәа рҿы иҟоу алхратә ҭыԥқәа хәба ҳарҭааит. Иазгәасҭарц сҭахуп амш шыцәгьоугьы алхыҩцәа раара шыбзиоу. Имаҷҩымкәа атәанчаҩцәа ртәылауаҩратә уалԥшьа анагӡаразы иахь абжьыҭира иааит. Аилагарақәа ҳәа акгьы азгәаҳамҭаӡацт. Зегьы Аԥсны Аҳәынҭқарра азакәанԥҵара инақәыршәаны имҩаԥысуеит», - ҳәа илҳәеит лара. «Ҳара шьыжьы инаркны алхратә округқәа ҳарҭаааны алхыҩцәа, иара убас  анаԥшыҩцәа  ҳрыҿцәажәеит.

Аҟәа. Хәажәкырамза 12, 2022 шықәса. Аԥсныпресс. Аԥсныпресс акорреспондентцәа Аҟәатәи алхратә округқәа №№ 1, 2, 3, 6, 7, 8 ирҭааит.

Аокруг №1 алхырҭатә ҭыԥхада ахантәаҩы Лиана Хәарҵкьиа лажәақәа рыла, макьаназы еилагара ҳәа акгьы ыҟам, абжьыҭира ҭышәынтәаланы имҩаԥысуеит.  

«Асааҭ 10:00 рзы актәи аучасток аҿы рыбжьы арҭахьан 89-ҩык, аҩбатәи аучасток аҿы – 66-ҩык, зынӡа иааизакны -  161-ҩык», - ҳәа инаҵшьны иазгәалҭеит лара.

Алхратә округ №2 ахантәаҩы Леонид Ӷәынџьиа иҟаиҵаз адыррақәа рыла, асааҭ  10:35 рзы аокруг № 2 аучасток № 1 аҿы зыбжьы зҭииз рхыԥхьаӡара  - 184 - ҩык рҟынӡа инаӡоит.    Алхрақәа ҭынч имҩаԥысуеит. Аучасток арегламент ишаҳәо ала асааҭ  08:00 рзы иаартын.

Уи акомиссиа алахәылацәа ацхыраара рызҭо анаԥшыҩцәа иҭабуп ҳәа реиҳәеит.

Аокруг №3 ахантәаҩы  Манана Каҷабаа лажәақәа рыла, «абжьыҭара аныҳәак еиԥш имҩаԥысуеит, изеиԥшразаалак аилагарақәа ыҟаӡам, ауаа зегьы ргәалаҟазаара бзиоуп, зегьы асабрадатә режим нарыгӡоит.  Аучасток аартын асааҭ 08:00 рзы. Амш шыцәгьоугьы, ауаа рааишьа бзиоуп. Убас, шьыжьы инаркны асааҭ 11 – рзынӡа араҟа зыбжьы азҭахьоу рхыԥхьаӡара 180-ҩык рҟынӡа инаӡеит».

Аҟәа. Хәажәкырамза 12, 2022 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аԥсны Жәлар Реизара  - Апарламент ахь алхрақәа рҿы ибжьы аиҭеит.

Аҳәынҭқарра Ахада ауаажәларратә уалԥхықәра наигӡеит дахьҭаҩыз аҭыԥ ала, иқыҭа гәакьа Тамшь аҿы.

«Сара агәыӷра сымоуп, зегьы ишахәҭоу ала имҩаԥысып ҳәа, избан акәзар иахьа иалаҳхуа ауаа ҳаԥхьаҟа рнапы злакхо аус  даара имариам. Урҭ акыр зҵазкуа аҳәынҭқарратә зҵаарақәа рыӡбараны иҟоуп.  Убри аҟнытә сара агәыӷра сымоуп  иреиӷьу адепутатцәа ралхра ҳалшап ҳәа», - ажурналистцәа дрыҿцәажәо иҳәеит Аҳәынҭқарра Ахада Аслан Бжьаниа. 

Аҟәа. Хәажәкырамза 12, 2022 шықәса. Аԥсныпресс.  Иҳаҩсыз уахыки-ҽнаки рыла акоронавирустә ҿкы чымазара азы агәаҭара иахысит 216 –ҩык, урҭ рахьынтә COVID-19 азы адиагноз 78-ҩык рҿы  ишьақәыргылоуп, ҳәа адырра ҟанаҵоит ауааԥсыра акоронавирустә ҿкы чымазара рацәыхьчара азы Аоперативтә Штаб.

Гәдоуҭатәи араионтә хәышәтәырҭа Хада  аҿы ишьҭоуп  19 – ҩык апациентцәа, 5 -ҩык ргәабзиара аҭагылазаашьа акыр иуадаҩуп, 14 -ҩык апациентцәа рҭагылазаашьа бжьаратәуп. Аҟәатәи аинфекциатә хәышәтәырҭа аҿы ишьҭоуп 27-ҩык апациентцәа, 12-ҩык ргәабзиара аҭагылазаашьа акыр иуадаҩуп, Очамчыратәи араионтә хәышәтәырҭа Хада аҿы – 4-ҩык, Гагратәи араионтә хәышәтәырҭа Хада аҿы – 11- ҩык, 3 - ҩык ргәабзиара аҭагылазаашьа акыр иуадаҩуп, Ҭҟәарчалтәи араионтә хәышәтәырҭа Хада аҿы ишьҭоуп – 4 - ҩык апациентцәа. Гәдоуҭатәи араионтә хәышәтәырҭа Хада аҿы рыԥсҭазаара иалҵит  74-шықәса зхыҵуаз аԥҳәыси,  88 – шықәса зхыҵуаз ахаҵеи. 

Акороновирусттә ҿкы чымазара зыхьыз ауаа рзеиԥш хыԥхьаӡара иахьазы  52 764 - ҩык рҟынӡа инаӡоит. Урҭ рахьытә 47 702 - ҩык ргәы бзиахахьеит, 664  - ҩык апациентцәа рыԥсҭазаара иалҵит.  

Аҟәа. Хәажәкырамза 12, 2022 шықәса. Аԥсныпресс. Иахьа Аԥсны иахьаҵанакуа имҩаԥысуеит Жәлар Реизара-Апарламент адепутатцәа ралхра азы абжьыҭира. Асааҭ 08:30 рзы Алхратә Комиссиа Хада апресс-центр аҟны АКХ ахантәаҩы Дмитри Маршьан еизаз зегьы иахьа ашьыжьымҭан, асааҭ  8 рзы ареспублика иахьаҵанакуа 152 алхратә ҭыԥхадақәа аусура ишалагаз атәы рзеиҭеиҳәеит.

«Атәылауаа алшара рымоуп рҭахра аарԥшразы. Акоронавирустә ҿкы чымазара алаҵәара инамаданы асоциалтә дистанциа анагӡареи асанитартә нормақәа рықәныҟәареи рзы аҳәара ҟаҳҵоит»,- ҳәа иҳәеит Дмитри Маршьан. 

ПАРЛАМЕНТ-НАРОДНОЕ СОБРАНИЕ РА<br>Официальный сайт
АГЕНТСТВО ПРАВИТЕЛЬСТВЕННОЙ СВЯЗИ РА<br>Официальный сайт
АДМИНИСТРАЦИЯ ПРЕЗИДЕНТА РЕСПУБЛИКИ АБХАЗИЯ<br>Официальный сайт
МЧС РЕСПУБЛИКИ АБХАЗИЯ<br>Официальный сайт
КАБИНЕТ МИНИСТРОВ РЕСПУБЛИКИ АБХАЗИЯ<br>Официальный сайт
МИНЗДРАВ РЕСПУБЛИКИ АБХАЗИЯ<br>Официальный сайт
МИНИСТЕРСТВО ИНОСТРАННЫХ ДЕЛ РЕСПУБЛИКИ АБХАЗИЯ<br>Официальный сайт
ГЕНЕРАЛЬНАЯ ПРОКУРАТУРА РЕСПУБЛИКИ АБХАЗИЯ<br>Официальный сайт
АКАДЕМИЯ НАУК АБХАЗИИ ГОСУДАРСТВЕННОЕ НАУЧНОЕ УЧРЕЖДЕНИЕ «СУХУМСКИЙ ФИЗИКО – ТЕХНИЧЕСКИЙ ИНСТИТУТ»
СУХУМ<br>Официальный сайт
МВД РЕСПУБЛИКИ АБХАЗИЯ<br>Официальный сайт
AUSURA.SU<br>Биржа труда
Яндекс.Метрика

Login to your account

Username *
Password *
Remember Me